انتصار عن ترك ”نفسنة”: أنا النجمة والناس مستكترة عليّ اللي أنا فيه

نفت الفنانة انتصار، أن يكون إبعادها من برنامج "نفسنة" الذي كانت تقدمه مع الفنانتين هيدي كرم وشيماء سيف، بسبب ذلة لسان، وتحديدا قولها "أنا النجمة هنا"، مؤكدةً: "التعالي مش من صفاتي، أنا بقالي كتير بشتغل، أنا طيبة جدا".
وأضافت انتصار، خلال حوارها مع الإعلامية بسمة وهبة مقدمة برنامج "العرافة"، على قناة "المحور": "ولما أقول أنا النجمة هنا ده حقي، أنا قلت أنا النجمة، الناس بتستغرب ليه لما أقول أصل أنا الجامدة أوي، أصل أنا الحلوة أوي وأهم كوميديانة في مصر، الناس مستكترة عليّ ليه اللي أنا فيه".
وتابعت: "هو أنا أفضل أشتغل 20 سنة ولما آجي أقول أنا مشهورة يتقال إني متعالية؟! انا مشهورة، اللي مش عاجبه إني مشهورة يضرب راسه في الحائط".
وأردفت: "ممشتش من البرنامج بدليل إني كملت بعد كده، لكن أنا مشيت لأن عندي مسلسلات كتير وبما إني أنا النجمة فأنا أكتر واحدة بشتغل في السوق، مسلسلات وأفلام ومسرحيات، الضغط عالي جدا، ومفيش تعاون من القناة في تنظيم أيام التسجيل".
وأوضحت: "بسجل 3 أيام كل 15 يوم، ولما يكون عندي مسرحية في إسكندرية ومسلسل، يبقى نتعاون مع بعض شوية، سجلوا مع حد غيري أنا قابلة تجيبوا حد تاني لحد ما أشوف شغلي في الإسكندرية، رفضوا كل حلولي، وشعرت بالتعنت، ومع شوية هيصة، وعند أول تلكيكة خلعت".