رئيس جمعية الكومبارسات إبراهيم عمران: هند رستم مارلين مونرو مصر... ويوسف شاهين عنده النجم زي الكومبارس

كشف الريجسير ورئيس جمعية الكومبارسات ابراهيم عمران عن مواقف جمعته بالراحلين هند رستم وعمر الشريف قائلا : الجيل اللي ميعرفش هند رستم بقولهم دي مارلين مونرو مصر، مرة بعتني ليها الأستاذ يوسف شاهين ابعتلها دعوة ودخلت بقولها دي دعوة من استاذ يوسف قالتلي أهلا باللي من ريحة الغالين ودخلت بيتها واتكلمت معاها، وسألتني أول حاجه و قالتلي الناس اللي ورا الكاميرا اخبارهم إيه، قالتلي لولا الناس دي مكنتش هكون موجودة، إيه الجمال ده؟.

وأضاف عمران خلال حواره مع الإعلامية انجي هشام في برنامج المنسي عبر قناة هي: كنت مرة بعمل فيلم حسن ومرقص مع الاستاذ عادل والاستاذ عمر الشريف، وأستاذ رامي إمام عمل بريك في مشهد كبير كان فيه مجهود وأنا كنت واقف يسيطر على المجاميع، وطلبت كرسي للاستاذ عمر الشريف قالي لا يا عم إبراهيم لما الناس كلها تقعد أنا هبقى أقعد.

وتحدث عن حياته مع المخرج يوسف شاهين قائلا : يوسف شاهين كان عنده النجم زي الكومبارس زي المجاميع كلنا عيلة واحدة وبناكل في طبق واحد.

برنامج " المنسي" هو برنامج على قناة " هي" تقديم الإعلامية انجي هشام، ويذاع يومي السبت والأحد في تمام الساعة الحادية عشر مساءا ويستضيف عددا من نجوم الفن والإعلامين الذي غابت عنهم أضواء الشهرة والنجومية.

https://fb.watch/lfglU2Qftn/?mibextid=Nif5oz