عمر محمد رياض: فيلم حجر إيجابي صعب.. وكنت طاير من الفرحة لما والدي طلب المشاركة في بطولة العمل

كشف الفنان الشاب عمر محمد رياض، تفاصيل فيلمه حجر إيجابي، والمقرر عرضه خلال الفترة المقبلة، والذي يشارك في بطولة والده الفنان محمد رياض.

وقال عمر محمد رياض، خلال حواره مع الإعلامية نورهان عبد الفتاح، في برنامجها "زووم ونص" عبر شاشة قناة هي: حجر إيجابي فيلم كان صعب جدًا، لأن إحنا اتنين شباب لسة متخرجين من الجامعة كان حلمهم يعملوا فيلم يقدروا يبعتوه مهرجان ويحاولوا يكون في منصات تتولاه، فكان الموضوع مش سهل لأن مكنتش بشتغل بـ كرو كامل ومن غير إنتاج.

وتابع: الموضوع كان صعب جدًا وكان هيحتاج وقت كبير علشان يتعرض، ودلوقتي إحنا بنتحرك في الجهتين إننا نعرضه في المهرجانات وفي منصة قريب هتتولى عرض الفيلم، وهنعرض الفيلم عرض خاص في إحدى السينمات الشهر اللي جاي.

كما تحدث عمر محمد رياض، عن مشاركة والده الفنان محمد رياض، في بطولة فيلم حجر إيجابي، قائلًا: أنا مطلبتش منه يشارك في الفيلم، وطبعًا أنا محظوظ أن أستاذ محمد يشارك خاصة أن كلنا شباب ومحتاجين خط قوي معانا في الفيلم، بس أنا عارف ظروف شغله ومواعيد تصوير فمحبتش إني أضغط عليه وأطلب منه المشاركة.

وأضاف: فوجئت أن هو اللي طلب يشارك بعد ما عرف قصة الفيلم وحبها، واتحمس للموضوع وشاف أن الدور اللي هيعمله شاف أنه هيكون مختلف بالنسبة ليه، وطبعًا كنت طاير من الفرحة.

وعن القصة الرئيسية التي يدور حولها الفيلم، فعلق عمر محمد رياض: إحنا مش بنركز على فكرة المرض والجائحة واللي حصل في العالم، إحنا بنتكلم على التغيير في سمات الشخصية في فترة الحجر، والحجر أثر علينا بشكل إيه، وعايزين نشوف الجانب الإيجابي للحجر للشعب المصري في الفترة دي، وده بنرصده من 3 طبقات مختلفة للشعب، إن إزاي قدروا يتعاملوا مع الموضوع وإزاي أثر فيهم.

واختتم حديثه قائلًا: الـ 3 طبقات دول بيربطهم دكتور كل واحد فيهم كان بيتعالج عنده ده اللي هو أستاذ محمد رياض، وهو اللي بيحكي للناس تجربتهم.

https://fb.watch/lLRz-lsUdr/?mibextid=RUbZ1f