بلدى

محمد على حسن

بلدى يا بحر من التعبير

نبضك قلبى وكُلِك خير

قالوا فراعنة وقالوا تاريخ

وأنتى الباقية وغيرك طير

روحى وروحى شوية كمان

دمى فـ رملك سال سلسال

عمرى وعمرى شوية كمان

ياللى القلب فـ حبك مال

بلدى الورد وغيرها الشوك

بلدى حياتى وعالية لفوق

مين هيرَبّى فـ قلبى شكوك

مهما هيحصل هى شروق

أيوة حلمت وفيها أنا عشت

أيوة الحال مش زى الحال

لكن غالية دى زى البنت

تتحمل علشانها جبال

مِيلى عليا وزيدى الضغط

عاشق ليكى وليكى العشق

عشق زى النيل بالظبط

دايما يروى ولِيه الحق

مهما يقولوا ومهما يعيدوا

مهما يضيفوا ومهما يزيدوا

مين ماعشقش ترابك يوم

مين محلمش وكان مهموم

إنك تبقى الحضن الباقى

لما الدنيا عليه بتقوم

دى قعدة شاى على القهوة

دى ضحكة بنت على سهوة

دى غمزة حب مع لمسة

دا شيخ بطريقته فى الخلوة

دا كورنيش نيل وحبيبه

تلاقى شباب مع الشيبة

دى دمعة حزن على ميت

دى فرحة أم مـ الطيبة